Што вы будзеце рабіць 25 лютага і чаму варта пайсці на выбары? На пытанні адказвае заслужаная артыстка Рэспублікі Беларусь Вікторыя Алешка:
— У нядзелю ў Беларусі ўпершыню пройдзе адзіны дзень галасавання, калі адначасова будуць абірацца дэпутаты Палаты прадстаўнікоў Нацыянальнага сходу восьмага склікання і мясцовых Саветаў дэпутатаў дваццаць дзявятага склікання. Лічу, што кожнаму беларусу трэба прыйсці на ўчастак і выканаць свой грамадзянскі абавязак. Бо менавіта мы разам вызначаем, якой будзе наша краіна і будучыня для нас і нашых дзяцей.
На мой погляд, гэтыя выбары маюць вялікае значэнне, бо і парламентарыі, і дэпутаты мясцовых саветаў — пасярэднікі паміж народам і ўладай. Праз іх праблемы грамадзян могуць быць пачутыя і вырашаныя ў самыя кароткія тэрміны.
З кандыдатам ад свайго раёна я вызначылася, пазнаёміўшыся з палітычнымі праграмамі ўсіх прадстаўнікоў. Для мяне важна, каб чалавек быў прафесіяналам сваёй справы і заўсёды кіраваўся прынцыпамі справядлівасці і сумленнасці. Каб яго праца была арыентаваная выключна на карысць нашага народа.
У дзень галасавання я, як правіла, знаходжуся ў гушчы падзей, радую сваёй творчасцю выбаршчыкаў. Таму па добрай традыцыі аддаю свой голас загадзя.