Год таму пайшоў з жыцця архітэктар Сяргей Багласаў — чалавек, без якога сённяшні Мінск меў бы іншае аблічча. Ён кіраваў аўтарскімі калектывамі па рэканструкцыі Траецкага прадмесця і рэгенерацыі гістарычнага цэнтра, адбудоўваў ратушу і іншыя славутасці. У сімвалічны час, калі сталіца рыхтавалася да Дня горада, у Мастацкай галерэі Міхаіла Савіцкага адкрылася выстава памяці дойліда.
Сімвалічнае і месца экcпазіцыі: Сяргей Багласаў быў на вуковым кіраўніком рэстаўрацыі былога сядзібнага дома, дзе цяпер месціцца галерэя. У будынку захавана анфіладная планіроўка, а частка залаў уяўляе сабой рэканструяваныя інтэр’еры даўніх часоў. Адноўлена таксама агароджа з брамай, якая выходзіць на плошчу і фарміруе аблічча галоўнага фасада.
Выстава “Горад. Жывапіс. Архітэктура” раскрывае дзве іпастасі Сяргея Багласава: архітэктар і жывапісец. Калі пра першую ведаюць многія, то ў другой творца знаёмы даволі вузкаму колу. Я даведаўся пра Сяргея Георгіевіча як мастака пазалетась. Тады ён у Нацыянальным цэнтры сучасных мастацтваў прэзентаваў серыю абстрактных кампазіцый “Вобразы гукаў славянскай азбукі”. У жывапісных работах аўтар паспрабаваў перадаць асацыяцыі, якія выклікалі ў яго гукі мовы і літары, што іх абазначаюць. І атрымалася пераканаўча. Мінімальнымі сродкамі мастак адлюстроўвае “б” — моцны, як барацьба, калючы “к”, пануры “ч”… Уражвае і тое, як трапна творца прыкмячае паралелі паміж гукам, яго графічным запісам і семантыкай слоў, якія змяшчаюць гэтыя адзінкі. Здаецца, не проста так “ідал” пачынаецца з нелабіялізаванага гуку (пры яго вымаўленні губы застаюцца пасіўнымі), які імкліва імкнецца ў прастору, і стромкай літарай, што сапраўды нагадвае каменны слуп-выяву нейкага старадаўняга боства. На выставе ў Мастацкай галерэі Мі хаіла Савіцкага можна яшчэ раз прыгледзецца да незвычайных знаходак Сяргея Багласава на мяжы жывапісу і лінгвістыкі.
Побач дэманструецца няскончаная серыя “Вобразы архітэктуры”, прысвечаная розным стылям і перыядам у гісторыі сусветнага дойлідства. У акрылавых работах — стрыманасць і імклівасць готыкі, строгасць класіцызму, пышнасць і ўзнёсласць барока. Нельга не прыкмеціць, з якой увагай ставіцца да кожнай дэталі мастак, як прадумана ўводзіць у архітэктурны пейзаж чалавечыя постаці — вясёлую купку музыкаў на прыступках ці маці з дачкой, што шпацыруюць па раскошным палацава-паркавым комплексе з маленькім сабачкам. Як адбітак архітэктарскай прафесіі — графічнасць, уласцівая карцінам Сяргея Багласава.
Цікава, што жывапіс мог стаць не дадатковым заняткам для майстра, а галоўнай справай жыцця. Калі ў дзяцінстве стаяў выбар паміж мастацтвам і спортам, хлопец доўга не вагаўся — пайшоў у студыю Сяргея Каткова, праз якую прайшлі многія зоркі беларускага мастацтва. Думаў працягваць адукацыю, але змяніў планы пад уплывам дзядзькі, вядомага прамысловага архітэктара Пятра Пракудзіна. Пасунуў жывапіс на другі план, паступіў на архітэктурны факультэт політэхнічнага інстытута, але ледзь не кінуў прафесію…
Калі Сяргей Багласаў вучыўся на апошнім курсе, пачаўся знос старой Нямігі. Усхваляваны малады чалавек расчараваўся ў абраным шляху, нават замест дыпломнага праекта напісаў карціну “Казка, што памірае”, прысвечаную разбуранай гістарычнай забудове. Аднак пазней сябры ўгаварылі рухацца далей, і выпускнік пайшоў у наваствораны сектар збору помнікаў гісторыі і культуры Акадэміі навук, дзе пра працаваў пяць гадоў. Гэта быў час неймаверных культурных адкрыццяў. Упершыню падчас экспедыцый творца ўжывую пабачыў узор рэнесанснай архітэктуры — незвычайнай прыгажосці касцёл у Чарнаўчыцах, адначасова радасць і расчараванне пакінуў забыты і разрабаваны на той час Волчынскі касцёл, да апошніх дзён успамінаў даследчык цудоўныя пейзажы Браслаўскага краю. Пабачанае ў вандроўках натхніла Сяргея Багласава, нібы прымусіла не здавацца, а зрабіць усё магчымае для вяртання нашых архітэктурных скарбаў.
Пра значныя работы Сяргея Багласава на выставе расказваюць планшэты з фотаздымкамі, пла намі, гістарычнымі матэрыяламі і кароткай даведкай. Аматарам мінуўшчыны цікава будзе параўнаць ранейшы выгляд мінскіх славутасцей на малюнках і чарцяжах з іх цяперашнім абліччам. Праз гэтыя выявы і тэксты глядач зразумее спецыфіку працы сучасных дойлідаў, якія аднаўляюць страчаную спадчыну. Да прыкладу, у аснову праекта ратушы ляглі пяць графічных рэканструкцый, апірышчам для якіх паслужылі праект і малюнак Фёдара Крамера, чарцёж архітэктара Казіміра Хршчановіча 1835 года, акварэль Юзафа Пешкі пачатку ХІХ стагоддзя і іншыя выяўленчыя матэрыялы і дакументы.
Яшчэ адзін важны пункт у творчай біяграфіі архітэктара — маштабныя працы ў Траецкім прадмесці. Гэта першы ў рэспубліцы вопыт комплекснай рэкан струкцыі і рэстаўрацыі квартала гістарычнай забудовы. Дагэтуль зробленае часта падвяргаюць крытыцы за празмерныя скажэнні. І праўда, аўтэнтычнае аблічча было зменена. Напрыклад, дах пакрылі чарапіцай, што не адпавядае гістарычнай праўдзе. Аднак у асабістай размове неяк Сяргей Георгіевіч патлумачыў: такое архітэктурнае рашэнне было навязана зверху. Таму пры ацэнцы такіх работ не варта забываць пра ўплыў знешніх фактараў, спіхваючы віну за любы нюанс на аўтарскі калектыў.
Выстава таксама знаёміць з праектамі, якія пайшлі следам за рэканструкцыяй і рэстаўрацыяй Траецкага прадмесця. Узвядзенне нанова гасцініцы “Еўропа”, забудова вуліцы Нямігі, гатэль “Манастырскі”… Сам творца з найбольшай цеплынёй ставіўся да вулачак Верхняга горада. Незадоўга да адыходу ён падзяліўся: “Самае прыгожае месца для мяне — вуліца Герцэна. Яна вельмі цэльная. Вельмі каларытны будынак былога манастыра. Гасцініца ў гэтых сценах атрымалася пераканаўчай. Выразная вуліца Кірылы і Мяфодзія. І, канешне, ваколіцы ратушы. Вельмі прыемна бываць там: адухоўленасць у найвышэйшай ступені. Асаблівая аўра там з’явілася, калі ў гэтым месцы пачалі ладзіць канцэрты”.
Гэта выстава не толькі даніна памяці майстра, але і своеасаблівае запрашэнне да дыялогу пра будучыню сталіцы: як удасканальваць архітэктурнае абліч ча горада? Нагодай выступаюць нерэалізаваныя задумы Сяргея Багласава. Найперш амбіцыйны праект нацыянальнага гісторыка археалагічнага цэнтра “Мінскае замчышча” з падземнай музейнай экспазіцыяй, абазначэннем месцазнаходжання замка, амфітэатрам і іншымі аб’ектамі. Ён мусіць вырашыць праблему адсутнасці бачных слядоў старадаўняга ядра горада.
Нарэшце, экспазіцыя дазваляе напоўніцу ацаніць творчую пладавітасць Сяргея Багласава. Пе раканацца ў маштабе зробленага дазваляе галерэя фотаздымкаў. У парах паказаны кадры гістарычнага цэнтра горада, зробленыя архітэктарам у 1970—1990я гады, і сучасныя фатаграфіі гэтых жа мясцін.
Данііл ШЭЙКА
Фота з выставы