Работы гродзенскай мастачкі прадставілі на выставе ў гандлёвым цэнтры «Сталіца» ў Мінску. Экспазіцыя «Яе рук справа» з'яўляецца вялікім творчым праектам Беларускага саюза жанчын. У гэты раз на ёй прадстаўлены карціны Людмілы Сцяпанавай, мастачкі з Гродна.
На выставе сабраны працы розных перыядаў творчасці мастачкі. Напрыклад, наведвальнікі змогуць убачыць гарадскія пейзажы акварэллю, на якіх адлюстраваны вуліцы Гродна і віды на Нёман.
Кульмінацыяй праекта стане вечар продажу падораных саюзу карцін. Атрыманыя грошы пойдуць на дабрачыннасць. З калекцыі Людмілы Сцяпанавай большасцю галасоў была выбрана работа пад назвай «Закінуты прычал», намаляваная вуглём і мелам.
