Дзіцячыя лісты з 1951 года
Менавіта вось так, праз знаёмага, які набыў каштоўныя дакументы ў букіністычнай краме, у рукі нашага былога фотакарэспандэнта, знакамітага беларускага фатографа Юрыя Іванова патрапілі цікавыя лісты, якія яшчэ раз сведчаць пра шматгранную дзейнасць народнага мастака БССР і СССР Заіра Азгура. Юрый Сяргеевіч, зразумеўшы значнасць знаходкі, адсканіраваў гэтыя папяровыя помнікі нядаўняга часу і перадаў іх у рэдакцыю “К”.
Што гэта за лісты? Гэты допісы, што дасылалі ў 1951 годзе навучэнцы дзіцячага дома ў паселішчы Пагост-Загародскі цяперашняга Пінскага раёна (тады Лагішынскага раёна Пінскай вобласці) на адрас знакамітага беларускага скульптара Заіра Азгура, які тады з’яўляўся дэпутатам Вярхоўнага Савета БССР. У гэтых лістах выхаванцы дзіцячага дома апісвалі сваё жыццё і прасілі дапамогі ў тых або іншых справах.
Напрыклад, так пачынаўся адзін з лістоў да Заіра Азгура:
10.04.1951.
Шматпаважаны т. Азгур!
Прабачце, што мы насмеліліся перапыніць час Вашай самаахвярнай працы, адхіліць Вашу каштоўную ўвагу нашым лістом. Гэта пішуць Вам 150 выхаванцаў Пагост-Загародскага дзіцячага дома, тыя дзеці, чые бацькі былі забітыя ў барацьбе за правую справу, за шчасце ўсіх нас. Можа быць, Вы яшчэ не забылі сустрэчы з загародцамі ў гэтым ціхім, глухім, самотным куточку Піншчыны. Мы ж ніколі не забудзем гэтага! Вось і цяпер успамінаецца Ваш мужны абрыс, асілкавы позірк Вашых добрых вачэй, Ваш высокі пад’ёмісты разумны лоб і пяшчотныя рысы твару. А натхняльная прамова, якую Вы па-аратарску прамовілі ў сельскай зале, знайшла гарачы водгук у сэрцах усіх выбаршчыкаў, натхняючы іх на яшчэ большую творчую працу на карысць нашай Радзімы. Гэтая разумная прамова залегла і ў нашых маленькіх сэрцах, і яна і зараз кліча нас ісці няспынна наперад, авалодваць ведамі, яшчэ лепш выступаць на сцэне, яшчэ лепш удзельнічаць у грамадскай працы […].
Далей дзеці апісвалі Заіру Азгуру сваё жыццё ў дзіцячым доме, як яны вучацца, чым займаюцца, пісалі, што “мы адчуваем многа цяжкасцей матэрыяльнага плану, але нягледзячы на гэта, па вучобе і арганізацыі працы наш дзіцячы дом адзначаецца, як перадавы”. А далей выказалі сваю просьбу да дэпутата Вярхоўнага Савета БССР.
[…] Нядаўна мы праводзілі збор дружыны на тэму “Добры дзень, дзіцячы дом у 1955 годзе”. Збор рыхтавалі камсамольцы пад кіраўніцтвам дырэктара. У ім мы акрэслілі вельмі многа цікавых будучых планаў пра тое, як ператварыць наш родны дзіцячы дом, пабудаваць завод, дастаць маторную лодку, аўтамашыну. Але як гэта зрабіць? Бо аўтамашына і цяпер нам патрэбна. Прыйшла вясна, а нам цяжка дастаць прадукты, што адчуваецца на нашым жыцці.
Набыццё машыны шмат у чым палепшыла б наш побыт. Можа быць, Вы дапамаглі б нам у гэтым?
Далей дзеці пісалі, што займаюцца ў розных гуртках, у тым ліку — у мастацкім. Але ім не стае фарбы для малявання і гэта затрымлівае іх навучанне. “Дарагі наш дзядзя Азгур! Ці маглі б Вы нам хоць крыху дапамагчы ў гэтым? — звярталіся да З. Азгура навучэнцы дзіцячага дома.
Напрыканцы ліста дзеці запрашалі скульптара да сябе ў дзіцячы дом на свята 1 Мая.
Палескі Макаранка
У перададзеных Юрыем Івановым дакументах, акрамя названага допісу, знайшоўся і ліст дырэктара дзіцячага дома, Захара Зімака. Асоба яго, да слова, вельмі незвычайная. Паляк, ураджэнец Варшавы, ён у 1939 годзе, пасля фашысцкай акупацыі Польшчы, апынуўся ў мястэчку Косава, што ў Івацэвіцкім раёне Брэсцкай вобласці. Працаваў тут настаўнікам, але пасля пачатку Вялікай Айчыннай вайны яго, разам з жонкай Аляксандрай, адправілі ў Косаўскае гета.
На шчасце, яны выжылі, а пазней, калі прыкладна 200 вязняў гета вызвалілі партызаны, уступілі ў партызанскі атрад. Там, у партызанскім атрадзе Пінскага злучэння імя Кутузава Захар Зімак стаў камандзірам аддзялення, удзельнічаў у баявых дзеяннях, быў паранены. За мужнасць падчас баявых дзеянняў Захар і Аляксандра Зімак былі адзначаны ордэнамі Вялікай Айчыннай вайны, медалямі “За баявыя заслугі”, “Партызану Айчыннай вайны” і многімі іншымі ўзнагародамі. А пасля вайны Захар Зімак стаў дырэктарам Пагост-Загародскага дзіцячага дома.
Тут і выявіўся ягоны педагагічны і выхаваўчы талент. Так, у пачатку педагагічнай дзейнасці Захар Зімак кіраваўся вучэннем Януша Корчака, выдатнага польскага педагога, лекара, пісьменніка, публіцыста, які працаваў у дзіцячых прытулках. Спатрэбілася і методыка выхавання цяжкіх падлеткаў Антона Макаранкі, а з Васілём Сухамлінскім Зімак быў знаёмы асабіста, вёў актыўную перапіску.
Усе гэтыя набытыя веды, — натуральна, разам з уласным унікальным вопытам і шчырай любоўю да дзяцей, — далі свой вынік. Так, у дзіцячым доме кожны з выхаванцаў выконваў пасільныя бытавыя абавязкі. Старэйшыя шэфствавалі над малымі і чыталі ім казкі на ноч. Адной з галоўных умоў выхавання быў занятак грамадска-карыснай працай. Акрамя таго, вялікая ўвага надавалася культурнаму і ваенна-патрыятычнаму выхаванню дзяцей і падлеткаў. Напрыклад, у летніх паходах выхаванцы прайшлі ваеннымі сцежкамі Піншчыны, збіралі мясцовы фальклор, пабывалі ва ўсіх гарадах-героях СССР. Пазней сотні выхаванцаў дзіцячага дома зрабіліся паспяховымі людзьмі і назаўсёды захавалі цёплыя ўспаміны пра сваіх настаўнікаў, якія замянілі ім бацькоў. Натуральна, адна з галоўных роляў у гэтым пераўтварэнні дзяцей у паўнацэнных грамадзян краіны належала дырэктару дзіцячага дома Захару Зімаку, палескаму Макаранку.
Адказ скульптара і чалавека
Вярнуся да адшуканых лістоў. Відаць, па просьбе сваіх выхаванцаў, Захар Зімак даслаў яшчэ адно пісьмо Заіру Азгуру, магчыма таму, што на першы допіс вядомы скульптар не адказаў. Як сцвярджае сам дырэктар у лісце да дэпутата Вярхоўнага Савета БССР, відаць, адрас, на які дасылалі ліст дзеці, быў не зусім слушным.
З ліста дырэктара дзіцячага дома:
[…] “Карыстаючыся выпадкам, я прашу аказаць дапамогу нашаму дзіцячаму дому. Дапамога гэта заключаецца ў тым, каб Вы, як наш дэпутат, пасадзейнічалі ў атрыманні некаторых жыццёва неабходных для нас матэрыяльных каштоўнасцей.
1. Вам цудоўна вядома, што мы знаходзімся ў закінутым месцы і адсутнасць транспарту адбіваецца на харчаванні і забеспячэнні дзяцей. Да раёна — 28 км, да Пінска — 35 км. Мы просім Вас атрымаць нарад на грузавую машыну для дзіцячага дома. Наша машына паламаная, стаіць разабраная. За 3 гады мы выдаткавалі на яе рамонт 30 тысяч рублёў, бо год яе нараджэння — 1936.
2. Мінск цяпер — прамысловы цэнтр. Нам для абсталявання майстэрняў неабходна мець некалькі такарных і электрасвідравальных станкоў. Не ведаем, куды звярнуцца для таго, каб іх набыць.
3. У нас у дзіцячым доме — 12 выхаванцаў — мастакоў. Але цяпер скончылася ўся мастацкая алейная фарба, якую нам даслалі шэфы. Набыць тут няма дзе. Падкажыце, калі ласка, ці можна набыць у Мінску фарбы, і на чый адрас даслаць грошы.”
Мы вельмі выбачаемся за тое, што Вас турбуем. Але ж Вы наш дэпутат, і гэта дае нам маральнае права звяртацца да Вас, можа быць, і з дробязямі.
Зразумела, Заір Азгур не мог не адгукнуцца на гэтую просьбу. Пра тое, што ён зрабіў, напісалі самі дзеці ў віншавальным лісце з Новым, 1952 годам:
Шматпаважаны і дарагі Заір Азгур!
Мы, выхаванцы Пагост-Загародскага дзіцячага дома №1 Пінскай вобласці, горача віншуем Вас з Новым 1952 годам, ад усёй душы жадаем Вам доўгіх гадоў жыцця, многа шчасця і бесперапыннай энергіі ў Вашай высокашаноўнай працы.
Мы ўсе, 180 насельнікаў дзіцячага дома, шчыра ўдзячны Вам за тую вялікую дапамогу, якую Вы нам аказалі ў набыцці аўтамашыны. Атрымаўшы такі багаты падарунак, мы прыкладзём усе намаганні, каб апраўдаць клопаты пра дзяцей-сірот нашага роднага ўрада, любімага Сталіна і ўсяго савецкага народа. Мы сваёй вучобай, дысцыплінай і працай будзем штодня ўмацоўваць магутнасць нашай прыгожай Радзімы і мір ва ўсім свеце! […]
Думаецца, што іншыя просьбы выхаванцаў дзіцячага дома Заір Азгур таксама змог вырашыць. Прычым, дакладна можна сказаць, што супрацоўніцтва і сяброўства з выхаванцамі палескага дзіцячага дома, з жыхарамі мястэчка не перапынілася гэтым ліставаннем, а толькі пачалося. Так, у 1956 годзе ў Пагост-Загародскім быў адкрыты помнік на брацкай магіле, а ў 1958 годзе ў мястэчку паўстаў помнік Леніну. Усе гэтыя работы — аўтарства Заіра Азгура, скульптара і проста Чалавека, неабыякавага і шчырага, гатовага дапамагчы кожнаму ўсім, чым толькі магчыма.
Юрый ЧАРНЯКЕВІЧ
Ілюстрацыі і фота
Юрыя ІВАНОВА