Традыцыйна ў першы месяц вясны Нацыянальны акадэмічны канцэртны аркестр Беларусі імя М. Я. Фінберга арганізоўвае мастацкі праект “Шлягеры на ўсе часы”. Сёлета мерапрыемства прайшло ў 17-ы раз і ўключыла ў сябе разнастайныя выступленні, што публіка ўбачыла 22, 23 і 26 сакавіка. Якія хіты гучалі і як на іх рэагавала аўдыторыя?

Праект быў створаны Міхаілам Фінбергам пры падтрымцы Міністэрства культуры Рэспублікі Беларусь і Мінскага гарадскога выканаўчага камітэта. У гэтым годзе трохдзённы музычны марафон складаўся з вечароў, прысвечаных рамансам, творчасці Аляксандры Пахмутавай і Мікалая Дабранравава, беларускай песні. 

— Годна выступіць у межах трох канцэртных праграм запар — складаная задача нават для заслужанага калектыву. Але ў аркестры з’явілася падмацаванне: мы ўзялі чатырох салістаў. Два з іх — будучыя выпускнікі айчынных ВНУ, якія прыйдуць да нас па размеркаванні: Антон Карчэўскі з Беларускай дзяржаўнай акадэміі музыкі ды Ірына Іршонак з Беларускага дзяржаўнага ўніверсітэта культуры і мастацтваў. 

Галоўны дырыжор Максім Расоха і аркестр імя М. Я. Фінберга

Для праекта імкнёмся ствараць новыя цікавыя праграмы. Як толькі заканчваем наш фестываль песні, адразу ж плануем, якімі будуць “Шлягеры на ўсе часы” наступным разам. Спачатку прыходзіць ідэя, бачанне агульнай канцэпцыі, затым прыступаем да працы. Гэта карпатлівы працэс, што патрабуе вялікай папярэдняй падрыхтоўкі, — распавядае Максім Расоха, мастацкі кіраўнік і галоўны дырыжор Нацыянальнага акадэмічнага канцэртнага аркестра Беларусі імя М. Я. Фінберга. 

ПЕСНІ НЕ ЗАБУДУЦЦА 

Асноўная задача праекта — асвяжыць у памяці музыку, якая была папулярнай у розныя часы, і зрабіць акцэнт на айчыннай культуры. У першы дзень марафону прыхільнікі аркестра пачулі любімыя рамансы. Некаторыя з іх гучалі ў вядомых савецкіх фільмах. Салісты таксама спелі творы з рэпертуару Мікалая Наскова, Аляксандра Малініна, Аўраама Русо ў новых аранжыроўках. 

Другі вечар быў прысвечаны творчасці Аляксандры Пахмутавай (якая сёлета адзначае 95-годдзе) і Мікалая Дабранравава. На сцэне прадставілі хіты легендарнага тандэма: Дзмітрый Качароўскі выканаў кампазіцыю “Молодость моя, Белоруссия”, Алеся Дзяржавец — “Ненаглядный мой”, Андрэй Коласаў — “Трус не играет в хоккей”. А “Беловежскую пущу” прайгралі без слоў. Гэта падштурхнула ўсіх прысутных хорам праспяваць такія знаёмыя радкі: “Мне понятна твоя вековая печаль, Беловежская пуща, Беловежская пуща...” 

— Працую ў аркестры з верасня. Лічу поспехам, што мне выпаў гонар паўдзельнічаць у праекце “Шлягеры на ўсе часы”. Адчуванні неверагодныя: дарослы і патрабавальны глядач спявае з намі ва ўнісон і радуецца, як дзіця. Самая вялікая ўзнагарода — бачыць, як людзі атрымліваюць асалоду ад нашага выканання, — дзеліцца ўражаннямі салістка Нацыянальнага акадэмічнага канцэртнага аркестра Беларусі імя М. Я. Фінберга Радміла Рыбакова. — Сёння я прадставіла кампазіцыю “Хорошие девчата” з вядомай савецкай кінастужкі “Девчата”. Падчас выступлення падалося, што ўся жаночая аўдыторыя — тыя самыя сяброўкі, з якімі мы даўно знаёмыя. На падобных канцэртах атрымліваеш вялікі зарад пазітыву, матывацыі і ў чарговы раз пераконваешся: добрай музыкі шмат не бывае, яна павінна жыць у нашых галасах і сэрцах. 

Дзмітрый Качароўскі выконвае кампазіцыю "Молодость моя, Белоруссия"

На заключнай імпрэзе прагучалі беларускія шлягеры. Аркестр імя Міхаіла Якаўлевіча Фінберга падарыў прыхільнікам унікальную магчымасць успомніць кампазітараў, выканаўцаў і паэтаў-песеннікаў айчыннай эстрады: Уладзіміра Мулявіна, Анатоля Ярмоленку, Віктара Вуячыча, Яраслава Еўдакімава ды многіх іншых. 

АКУНУЦЦА Ў МАЛАДОСЦЬ 

Падчас кожнай з трох абсалютна розных музычных праграм на сцэне знаходзілася больш за 50 артыстаў. 

— Не штодня можна паслухаць класны беларускі аркестр, у якім граюць выключна прафесіяналы. Мэтавая аўдыторыя праекта — дарослыя людзі, якія разумеюць, што за песні тут прагучаць. Гэтыя людзі шчыра радуюцца кампазіцыям, якія акунаюць у маладосць, з нецярпеннем чакаюць на сцэне любімых артыстаў, чые імёны даўно ведаюць, і не баяцца паказваць эмоцыі: гучна падпяваюць і нават падтанцоўваюць. Менавіта такая рэакцыя на шлягеры і павінна быць, — падкрэслівае Максім Расо- ха. — У старым таксама можна знайсці нешта новае. Некаторыя слухачы прыходзяць на канцэрты 17 гадоў запар і заўважаюць, як усё мяняецца ў лепшы бок. 

Аркестр імя Міхаіла Якаўлевіча Фінберга зноў падарыў гледачу магчымасць панастальгіраваць. Дынамічныя і лірычныя песні кранулі сэрцы нават самых дасведчаных слухачоў. Але гэта не адзіная ініцыятыва заслужанага калектыву: ён паўдзельнічае ў дзіцяча-юнацкім культурнаасветніцкім праекце “Мы — музычная будучыня краіны”, створаным на грант фонду Прэзідэнта Рэспублікі Беларусь па падтрымцы таленавітай моладзі. Найлепшыя навучэнцы школ мастацтваў выступяць у суправаджэнні прафесійнага аркестра на вядучых канцэртных пляцоўках краіны. Мерапрыемствы пройдуць у сталіцы і ва ўсіх абласных гарадах. А гала-канцэрт запланаваны на 18 мая ў рамках летняга музычнатурыстычнага сезона пад адкрытым небам у Верхнім горадзе. Кожны зможа атрымаць асалоду ад творчасці любімых артыстаў і юных талентаў. 

Настасся ЮРКЕВІЧ 

Фота аўтара