Паважаныя калегі, дарагія сябры! Ад імя Міністэрства культуры і ад сябе асабіста сардэчна віншую вас са знамянальнай датай  — 35-годдзем з дня заснавання газеты “Культура”!

Такая дата  — не проста вяха ў гісторыі вашага выдання. Гэта сведчанне яго аўтарытэту, запатрабаванасці і той адметнай ролі, якую “Культура” адыгрывае ў інфармацыйнай прасторы нашай краіны.

На працягу 35 гадоў вы застаяцеся галоўным друкаваным голасам культурнага жыцця Рэспублікі Беларусь. На старонках вашай газеты знаходзяць адлюстраванне самыя яркія падзеі, вядзецца аналіз мастацкіх набыткаў, узнімаюцца пытанні захавання гісторыка-культурнай спадчыны і развіцця творчых індустрый.

Вы забяспечваеце ўнікальную пляцоўку для зацікаўленага дыялогу паміж дзеячамі мастацтваў, экспертамі і шырокай аўдыторыяй.

Асабліва каштоўна, што за ўсім гэтым стаіць высокі прафесіяналізм работнікаў рэдакцыі. Вам удаецца спалучаць вернасць найлепшым традыцыям айчыннай публіцыстыкі з сучаснымі тэхналогіямі, гаварыць пра складанае даступна і займальна.

Ваша праца мае вялізнае значэнне для грамадства. У эпоху інфармацыйнага шуму менавіта такія выданні служаць надзейным маральным арыенцірам, дапамагаючы ўмацоўваць духоўныя каштоўнасці, фарміраваць эстэтычны густ, захоўваць і развіваць наш найбагацейшы культурны здабытак.

Жадаю вашай газеце творчага даўгалецця, яркіх тэм і смелых праектаў! Няхай кожны новы нумар знаходзіць жывы водгук у сэрцах чытачоў па ўсёй краіне.

З павагай, Міністр культуры Рэспублікі Беларусь Марат МАРКАЎ