Што вылучае паспяховага чалавека? Можна доўга разважаць аб прыродных дадзеных, працавітасці і ўдачы, але рубрыка “Максіма маладых”, здаецца, вывела галоўны кампанент поспеху — упартасць.
Нашы героі не апускаюць рукі пасля няўдач, спрабуюць зноў і зноў, кідаюць выклік лёсу і ўласным магчымасцям. А пасля аказваюцца на п’едэстале ды на старонках “К”. Самір Ёлчыеў прадставіць Беларусь на Міжнародным конкурсе выканаўцаў эстраднай песні “Віцебск — 2023”. Колькі разоў ён спрабаваў прайсці адбор, якія цяжкасці сустракаліся на шляху і як удалося захаваць веру ў сябе?
Самір пачаў займацца спевамі са школьнага ўзросту. На ўроках музыкі настаўніца заўважыла яго вакальныя здольнасці і запрасіла ў гурток.
Насамрэч, голас у нашага героя выбітны, на што нават у той час многія звярталі ўвагу. Педагогі наўзахваткі заклікалі таленавітае дзіця да сябе. Хлопец, ужо тады разумеючы, што чым больш рознага вопыту — тым больш ведаў, пераходзіў ад аднаго настаўніка да іншага.
Важнай прыступкай у кар’еры Саміра Ёлчыева стала перамога на аршанскім раённым фестывалі творчасці дзяцей і моладзі “Буду зоркай”. Там Саміра прыкмеціў педагог узорнай студыі эстраднай песні “Рафлезія” гарадскога Цэнтра культуры, дзе хлопчык празаймаўся да паступлення ў Магілёўскі дзяржаўны каледж мастацтваў на спецыяльнасць “Мастацтва эстрады (спевы)”.
— Я ўдзячны кожнаму настаўніку, хто даў мне нешта важнае, навучыў прафесійным навыкам або чалавечым якасцям, — кажа герой.
Вучоба ў каледжы адкрыла перад Самірам дзверы ў свет спаборніцтваў. Ён шчыра прызнаецца:
— Я паўдзельнічаў, напэўна, ва ўсіх песенных конкурсах Беларусі і ў некаторых замежных. Але нават пасля таго, як прайшоў нацыянальны адбор на “Славянскі базар”, разумею неабходнасць рухацца далей.
Цяпер наш герой працуе па размеркаванні ў роднай Оршы ў гарадскім Цэнтры культуры “Перамога” загадчыкам дзіцячага сектара.
— У нас шмат аматарскіх калектываў. Хлопчыкі і дзяўчынкі наведваюць заняткі па харэаграфіі, маляванні, музыцы, і я кірую гэтым працэсам, — тлумачыць малады чалавек.
Сам выкладаць пакуль не збіраецца, хоць і мае для гэтага прыдатную кампетэнцыю. Нашага героя больш прываблівае сцэна, з якой ён кранае сэрцы людзей.
Аб планах малады талент распавядае з асцярожнасцю, але ж марыць сабе дазваляе:
— Хачу развівацца як сольны выканаўца. Разумею, гэта досыць цяжка, затратна і ў фінансавым, і ў эмацыйным плане, але выступаць з уласнымі песнямі — мая галоўная мэта ў жыцці.
Самір ужо запісаў два трэкі, але іх пакуль не выпускае, плануе пазнаёміць свет адразу з альбомам.
— Вершы пішу сам, — трохі саромеючыся, распавядае наш герой. — Гэта, напэўна, як у многіх, пачалося: мне было гадоў шаснаццаць, першае непадзеленае каханне... Радкі выпадкова з’явіліся ў галаве, і я адчуў, што больш без гэтага не змагу.
Натхненне прыходзіць да хлопца ноччу. Ён гуляе па маўклівым горадзе, слухае аранжыроўкі без слоў і стварае тэксты.
— Галоўнае — адразу ўсё запісваць. Бывае, чатырохрадкоўе прысніцца, і, калі яго не злавіць, не перанесці ў нататкі ў тэлефоне або на паперу, яно знікне, растворыцца ў памяці, — дзеліцца сакрэтамі творчага працэсу спявак.
Цяпер Саміру дваццаць, а ў пятнаццаць гадоў здарылася першая спроба трапіць на “Славянскі базар”.
— Выклаў на сваю старонку ва “УКантакце” пост з фатаграфіяй фестывалю і подпісам: “Калі-небудзь я там спяю”, — смяецца наш герой.
Я неяк асабліва перажываю беларускія песні, магу данесці патрэбную эмоцыю.
Летась выканаўца дайшоў да другога этапу, аднак прасунуцца далей не ўдалося. І толькі ў 2023-м здолеў дамагчыся мэты.
— “Славянскі базар” — самы прэстыжны конкурс, бо на ім ты не толькі адказваеш за сябе, але і прадстаўляеш краіну. Хочацца скокнуць вышэй за галаву, паказаць Беларусь з найлепшага боку. Так, гэта велізарны цяжар адказнасці, аднак жа яшчэ і неверагодная энергетыка, — разважае Самір.
Першы этап адбору прайшоў для хлопца без асаблівых хваляванняў. Ён разумеў, што ўсе ўдзельнікі маюць высокі ўзровень, аднак рэальна ацэньваў і ўласныя сілы. Крыху складаней было, калі засталося па пяць чалавек з кожнай вобласці:
— Я памятаю сваю думку на другім туры: “Які магутны вакал!” Ніводнага аматара, толькі прафесіяналы!
Праход у фінал стаўся шокам. Самір прыехаў у Слуцк з маленькай групай падтрымкі: Юрый Жукаў пісаў аранжыроўку, а яго жонка дапамагала з арганізацыйнымі момантамі.
— Шчыра кажучы, я сам сабе задаваў пытанне: “Што я тут раблю?” Без сувязей, без прывілей... У некаторых выступоўцаў былі цэлыя каманды, прыгожыя касцюмы. Я ж быў адзін. Мой голас і мае пачуцці — вось і ўся зброя, — успамінае спявак.
Хвалявання дадаваў і той факт, што на лёсаванні ён выцягнуў першы нумар. Нешчаслівы. На конкурсах ёсць прыкмета: калі ў пачатку выступаеш — не перамагаеш. Лічыцца, быццам журы забываецца праз шматлікія ўражанні.
— Я вельмі крытычны да сваіх навыкаў, заўсёды хачу зрабіць як мага лепш. Аднак у той момант вырашыў: выцягнутая адзінка — мая перавага. Я задам рэй, і хай астатнія паспрабуюць дацягнуцца да маёй планкі, — раскрывае сакрэт поспеху Самір.
Канкурсантам неабходна было падрыхтаваць па два нумары: нацыянальны і замежны хіт. Ёлчыеву заўсёды ўдаваліся песні на беларускай мове:
— Мне з дзяцінства казалі, што я неяк асабліва іх пражываю, магу данесці патрэбную эмоцыю.
Хлопец захапляецца творчасцю Уладзіміра Мулявіна, таму абраў для выканання “Чырвоную ружу” ў рок- апрацоўцы. Аднак пасля першага выступлення наперад вырваўся канкурэнт — Данііл Савеня, а сам Самір падзяліў роўную колькасць балаў з Дар’яй Рудко.
Вядома, адставанне знервавала спевака. Аднак і дало свабоду:
— Вырашыў, хай будзе што будзе, і Feeling good у аранжыроўцы Юрыя Жукава выканаў, адчуваючы сябе вельмі добра. Калі аб’явілі балы, зразумеў, што перамог, аднак паверыць не мог. Здавалася, сплю. Яшчэ пяць дзён хадзіў, быццам зачараваны.
Асноўная падрыхтоўка да “Славянскага базару” прыпадае на красавік. Але пакуль наш герой адыходзіць ад турбот і прымае віншаванні. Падтрымка атачае яго з усіх бакоў.
— Мама хвалявалася больш за мяне. Яна не змагла паехаць у Слуцк, глядзела па тэлевізары. Тэлефанавала ўся ў слязах ад шчасця. У Віцебску будзе абавязкова! Здаецца, туды цэлая дэлегацыя з сям’і, сяброў і калег збярэцца, — дзеліцца планамі малады чалавек.
Ёсць у Саміра і магчымасць выбраць педагога. Наш герой хоча займацца з папулярным спеваком Пятром Ялфімавым:
— Нават дыстанцыйныя заняткі з Пятром Пятровічам былі б падарун¬ кам. Ён мой кумір і вялікі прафесіянал. Думаю, з яго дапамогай я павысіў бы ўзровень вакалу!
У ліпені ўся краіна будзе заўзець за Саміра Ёлчыева. Але ўжо сёння можна сказаць: чалавек, які не апусціў рукі пасля шэрага няўдач, раз за разам імкнуўся да перамогі, проста не здолее не выкласціся на 100 %.
Ксенія ЗАРЭЦКАЯ