Сучасны глядач не так часта ходзіць у тэатр па забаўкі.Для падобных мэт у чалавека ёсць YouTube або Netflix. Зрабіць намаганне: загадзя купіць білет, выбрацца з кватэры, некалькі гадзін сядзець на адным месцы, не зазіраючы ў тэлефон, — на гэтыя ахвяры адважваюцца дзеля пошуку духоўнага пажытку. Ці ўсюды такі можна знайсці? Зазірнём у Беларускі дзяржаўны тэатр лялек.
Глядач актыўна ідзе на модныя прадстаўленні з рознымі цялеснымі і гукавымі вынаходкамі, шукае адказы на экзістэнцыяльныя пытанні ў новых прачытаннях класікі. Хто, як не Чэхаў, заслугоўвае ўвагі? Яго імя ва ўсіх на слыху, і нават той, хто не надта далучаны да тэатральнага жыцця, напэўна, памятае са школы “Вішнёвы сад” ці “Чалавека ў футляры”. Увогуле, для большасці з нас відавочна, што ў Чэхава не бывае дробязна і па-дурному, у яго заўсёды глыбока і вытанчана. І нават гумар літаратара не пра надрыўны рогат, а пра ўсмешку, якая хаваецца ў праменьчыках вачэй. Ад гэтага драматурга мы чакаем думкі і яе развіцця, а не дзеяння.
“Іваноў” — не самая вядомая п’еса Антона Паўлавіча. Пры жыцці творца адхіляў усе пастаноўкі, перапісваў тэкст шмат разоў, спрабаваў данесці да артыстаў, як яны павінны іграць, але ніхто не мог патрапіць у яго бачанне. У адным з лістоў брату класік жорстка выказаўся: “Акцёры не разумеюць, нясуць глупства, бяруць сабе не тыя ролі, якія трэба, а я ваюю, верачы, што калі п’еса пойдзе не з тым размеркаваннем роляў, якое я зрабіў, то яна загіне”.
Нават Станіслаўскаму — свайму настаўніку і апаненту — Чэхаў забараніў ставіць “Іванова”. У чым была прычына? У нежаданні расчаравацца? Цяпер ужо не даведаемся…
Аднак у мінчан ёсць магчымасць пазнаёміцца з прачытаннем п’есы ад заслужанага дзеяча мастацтваў Рэспублікі Беларусь Аляксея Ляляўскага. Рэжысёр не проста замахнуўся на спрэчны твор, а вырашыў працаваць з самым першым варыянтам тэксту — камедыйным. Яшчэ Ляляўскі ўзяў на сябе адказнасць увасобіць усё так, як задумвалася драматургам першапачаткова. І адразу дадзім спойлер: нягледзячы на цяжкую задачу, атрымалася добра.
Адмысловы падыход рэжысёра да пастаноўкі адчуваецца яшчэ за дзвярыма тэатра. Абезаблічанае і строгае “Іваноў” змянілася на мяккае і крыху інфантыльнае “Нікалаша”. Быццам гаворка пойдзе не пра мужчыну ў крызісе сярэдняга ўзросту, а пра някемлівае дзіця, якое бацькі ласкава ўшчуваюць за свавольства.
Касцюмы акцёраў здольныя прывесці публіку ў шок. Замест сціплых сукенак у спакойных колерах, карычневых пінжакоў і белай мэблі — таго, да чаго мы прывыклі ў іншых пастаноўках (і не толькі тэатральных, але і тэлевізійных), — буянства фарбаў, вар’яцкія прычоскі, неверагодныя макіяжы і велізарныя карціны рускіх класікаў, што выглядаюць іншароднымі сярод разнамаснага натоўпу.
Сцэнаграфіяй займалася Людміла Скітовіч. Мастачцы ўдалося дасягнуць балансу там, дзе яго, здавалася б, проста не магло быць. Вось на сцэне велізарныя лебедзі, ростам з чалавека, тысячы пёраў якіх карпатліва прышывала мадэльер Ларыса Лапко. А вось спакойная і ўлагоджаная “Алёнушка” Васняцова, такая ж велізарная, аднак карціна выклікае іншыя эмоцыі. Дзея то стракаціць жанчынамі ў парыках з кветак і ў такіх яркіх сукенках, што баляць вочы, то запавольваецца ў лаканічнай абстаноўцы дырэктарскага кабінета, дзе з інтэр’ера — толькі стол і “Раніца ў сасновым лесе” Шышкіна.
Празмернасць вонкавага і прастата, калі не беднасць, унутранага — вось тое, на чым зрабіў акцэнт Ляляўскі. І кожны акцёр, кожны элемент на сцэне, кожны гук — нават звыклы для заўсёднікаў тэатра пераліў званочкаў, пад які нічога нечаканага не здараецца ніколі, — усё працуе на ўзмацненне гэтага кантрасту.
А які ж ён, Нікалаша? У пастаноўцы ніхто не называе персанажа так. Мікалай Аляксеевіч — збяднелы памешчык, які не тое каб не ведае, чаго хоча, ён не ўпэўнены, ці жадае чагосьці наогул. Іванову ледзь за трыццаць, і ён у крызісе. Цяпер такі чалавек у найлепшым выпадку пайшоў бы да псіхолага капацца ў дзіцячых траўмах, у найгоршым — пачаў бы заліваць гора алкаголем. Толькі ў чэхаўскім свеце, цягучым і павольным, нясхільным да дзеяння, у персанажа нават на гэта не хапае рашучасці. Іваноў... Дакладней — Нікалаша, ідзе туды, куды яго штурхаюць. Здаецца, падзьме вецер, і герой адправіцца следам за павевам.
Акцёр Дзмітрый Рачкоўскі ўвесь спектакль ходзіць з аднолькавым выразам твару. Гэта дзіўнае спалучэнне нуды, стомленасці і неразумення. Персанаж засоўвае рукі ў кішэні штаноў, быццам бы імкнучыся надаць сабе ўпэўненасці, але тое не надта дапамагае. Нікалаша Рачкоўскага — нядрэнны чалавек, толькі гэтага недастаткова. Каб рабіць дабро, патрэбен унутраны рэсурс, стрыжань, на якім трымаецца асоба. І акцёр, выразны і выбухны ў “Птушках” або “Тарцюфе”, тут ператвараецца ў папяровую лялечку, у цела якой выпадкова заляцела слабая душа.
Чэхаў тлумачыў характары герояў: “Сучасныя драматургі начыняюць свае п’есы выключна анёламі, падлюгамі і блазнамі... Я хацеў сарыгінальнічаць: не вывеў ніводнага злыдня, ніводнага анёла... Нікога не абвінаваціў, нікога не апраўдаў”.
І Ляляўскі цудоўна перадае гэтую ідэю. Нават цяжкахворая жонка Іванова, Ганна Пятроўна, дні якой злічаны і якую муж не кахае і ні ў грош не ставіць, не выклікае спагады. Наталля Кот-Кузьма, мабыць, адна з найяскравейшых актрыс сучаснасці, яе харызма здольная разварушыць самага абыякавага чалавека, а ў “Нікалашу” артыстка выглядае панылай. Хаця панылыя тут усё.
Але галоўная праблема — у іншым. Чаму спектакль у кагосьці выклікае смех і захапленне, а ў некаторых — нуду і жаданне хутчэй сысці?
Па адказ звернемся да ўспрымання трэцяга тыпу людзей. Тых, хто ўключаўся ў дзеянне на сцэне, адкідаючы ўсё знешняе — і ўборы, і жарты, крыху састарэлыя, калі не сказаць — пахабныя, і залішні надрыў другарадных акцёраў. За спектаклем “Нікалаша” крыецца нуда. Нуда чалавека, які не знайшоў сябе і не знайшоў сабе справу. Іваноў зусім не герой — ні часу, ні раманаў. Ён — звычайны мужык без усялякіх талентаў. Толькі адчувае свет крыху танчэй за іншых. Танчэй— не значыць глыбей.
Іваноў не ведае, як справіцца са сваім станам, нічога не выносіць з рэфлексіі, акрамя яшчэ большых пакут. Персанаж прычыняе беды жанчынам, што кахаюць яго. А прыяцелі, больш заможныя і больш суцэльныя асобы, хай і не такія ўдумлівыя, адчуваюць да таварыша лёгкую агіду. Нікалаша ў сваім жаданні ўзвысіцца над астатнімі, апрануць белае паліто і выдаліцца ад грамадства, якое расчароўвае будзённасцю, варты жалю.
Аднак звычайныя ў спектаклі ўсе. Людзі з банальнымі праблемамі. Не героі і не мысляры. Проста людзі, якія жывуць без іскры, бо так прывыклі. І, відавочна, акцёрам самім цяжка спраўляцца з грузам нуды і бессэнсоўнасці, што даводзіцца граць. А гледачы смяюцца. Ім жа здаецца, быццам усё гэта не пра нас…
Ксенія ЗАРЭЦКАЯ, студэнтка БДУ
Фота з сайта тэатра